30 ნოე. 2023
ალბათ ბევრ ჩვენგანს უფიქრია საოცნებო წერილის მიღებაზე ჰოგვორტსიდან და ჯადოქრობის სწავლაზე. არც ეთო იყო გამონაკლისი და, როგორც თვითონ ამბობს, ხშირად დაფრინავდა ღრუბლებში, წერილით მომავალი ბუს მოლოდინში.
ეთო, მარკეტინგის უფროსი სპეციალისტი, ამ ბლოგში მოგვიყვება თავისი ინდივიდუალური გზის შესახებ, რომელსაც ჰოგვორტსამდე არ მივყავართ, თუმცა არანაკლებ მაგიურია.
როგორც ვახსენეთ, ეთოს ფანჯარასთან დაბნეული ბუ არ მოფრენილა წერილით კლანჭებში, თუმცა ჩვეული სტუდენტური ცხოვრება ჰქონდა, თავისებური ჯადოსნურობებით.
ბიზნესის ადმინისტრირებაზე სწავლობდა და უნივერსიტეტის კლუბში იყო გაწევრიანებული, სადაც არაერთი პროექტის დაორგანიზებაში იღებდა მონაწილეობას. ეს პერიოდი მისთვის განსაკუთრებით მნიშვნელოვანი იყო, რადგან ბევრი საინტერესო ადამიანი გაიცნო და პროექტების მართვისთვის საჭირო გამოცდილება მიიღო.
ეთო ამ პერიოდში ქმნიდა მინი კომიქსებსა და პოსტერებს, რისი კეთებაც მისი საყვარელი საქმიანობა ჯერ კიდევ ბავშვობიდან იყო. ანიმაციებისა და კომიქსების შექმნის სურვილი მისი საკმაოდ უჩვეულო ოცნებიდან აღმოცენდა:
“კითხვაზე – “როცა გაიზრდები რა გამოხვალ?” – თავში ყოველთვის ანიმაციების გამხმოვანებელი მიტრიალებდა. საუკეთესო პროფესია მეგონა მაშინ. რა სჯობს კინოთეატრებში გამოსვლამდე ყველა ფილმისა თუ ანიმაციის ნახვას და მითუმეტეს მაშინ, როცა პერსონაჟი შენივე ხმით ალაპარაკდება ეკრანზე-მეთქი, ვფიქრობდი. კინოთეატრში ძალიან ხშირად დავდიოდი ოჯახთან ერთად და ეს ჩემი ერთ-ერთი ყველაზე საყვარელი მოგონებაა.”
ისევ რეალური სამყაროს ჰოგვორტსს რომ დავუბრუნდეთ, ეთომ სამსახურის აქტიური ძიება მეორე კურსიდან დაიწყო. მისთვის პრიორიტეტი მოქნილი გრაფიკი, სწავლასთან შეთავსების შესაძლებლობა, საკუთარი შემოსავლის ქონა და საინტერესო სამუშაო გამოცდილების მიღება იყო.
მუშაობის დაწყებამდე, 5 წლის წინ, ეთოს წარმოდგენაში საოფისე ცხოვრება რადიკალურად განსხვავდებოდა იმისგან, რაც აქ დახვდა:
“მოხატული კედლები, სასუსნავები, სათამაშოები, ფერად პუფებსა და ჰამაკებში მოკალათებული თანამშრომლები, რომლებიც თან პროექტებს უძღვებოდნენ, თან არც მხიარულება ავიწყდებოდათ, ჩემი წარმოდგენისგან სრულიად განსხვავდებოდა. მიხაროდა რომ ასეთ გარემოში მომიწევდა მუშაობა.”
ეთო თავდაპირველად მომხმარებელთა მხარდაჭერის გუნდში იყო. მისთვის საინტერესო სხვადასხვა პროექტში აქტიური მონაწილეობის შემდეგ კი, მარკეტინგის გუნდს შეუერთდა და მარკეტინგის სპეციალისტის პოზიციაზე გააგრძელა საკუთარი თავგადასავალი.
სწორედ ასე აღმოჩნდა ის რეალურ ჰოგვორტსში და თავით გადაეშვა კამპანიების დაგეგმვის, პროექტების დაორგანიზების, უამრავი დეტალით დატვირთულ, თუმცა საინტერესო და სახალისო პროცესში.
ეთო ამ პერიოდს განსაკუთრებულად იხსენებს, რადგან პროფესიულად გაიზარდა და უამრავი გამოცდილება მიიღო. მისი საქმიანობა დიდწილად მოიცავდა პროექტების გაწერასა და ორგანიზებას. ასევე, მუშაობდა ციფრულ პლატფორმებზე განსათავსებელი ქონთენთის შექმნაზე, რომლის პარალელურადაც სხვადასხვა ტიპის ვიდეო თუ ფოტო გადაღებების დაგეგმვისა და მოლაპარაკებების წარმოების გამოცდილებაც მიიღო.
მას შემდეგ, უკვე სამ წელზე მეტია მარკეტინგის დეპარტამენტში, უფროს სპეციალისტად მუშაობს და კომპანიისთვის კრეატიული პროექტების იდეიზაციასა და განხორციელებას უდგას სათავეში.
“ბრენდის პროექტებზე მუშაობისას ყოველთვის რაღაც სიახლეს აწყდები და მუდმივად სწავლობ. განძის მაძიებელი ხდები, თუმცა განძის მაგივრად იდეებს ეძებ, ეს კი მუდმივად ტონუსში გამყოფებს. კულმინაციური ნაწილი უკვე შენი შრომის მზა პროდუქტია, რომელიც ოდესღაც მხოლოდ იდეა იყო, ახლა კი ხორცშესხმული შედეგია.”
ბავშვობაზე საუბრისას, ეთომ მოგვიყვა, როგორ სურდა საკუთარი ანიმაციური სტუდიის გახსნა და თავად ანიმაციების შექმნაც მეგობრებთან ერთად.
კარადის უჯრები მუდმივად გამოჭედილი ჰქონდა საკანცელარიო ნივთებით, ჩანახატებით გადავსებული რვეულებითა და თაბახის ფურცლებით. როგორც არ უნდა მოენდომებინა, ვერასოდეს ახერხებდა მის დალაგებას, მაგრამ ალბათ ასეთ რამეებს დალაგება არც სჭირდება ხოლმე.
ეთოს თავისუფალ დროს ახლაც ხატვა იკავებს. საყვარელი მუსიკის ფონზე პერსონაჟების დიზაინებს ქმნის და, ბევრი დაუსრულებელი ჩანახატის მიუხედავად, ეს პროცესი არასდროს ბეზრდება.
ეთოს აზრით, პატარ-პატარა ტრადიციები აქცევს ცხოვრებას ჯადოსნურს:
“მიუხედავად იმისა, რომ ჰოგვორტისდან წერილი არ მიმიღია, ჩემი ცხოვრება სავსეა ჯადოსნური მომენტებით, რასაც საყვრელ ადამიანებთან ერთად ვქმნი. შესაძლებლობა, რომ მათთან ერთად ვიცინო, ვიხალისო, ვისწავლო და გავიზარდო, ჩემთვის ყველაზე საოცარი რამაა და ჯადოსნური ჯოხი სულაც არ სჭირდება.”
ყველა ადამიანის ყოველდღიურობაში დგება მომენტი, როცა გვეჩვენება, რომ დღეს ჩვენი დღე არაა, რაღაც არ გამოგვდის, იმედგაცრუბულები ვართ და თითქოს სადღაც გავიჭედეთ.
ეთო ასეთ სიტუაციებს საკმაოდ პოზიტიური განწყობით უმკლავდება – ესეც გაივლის.
სირთულეს აუცილებლად გადავლახავთ და შესაძლოა მომავალი დღე უფრო ნათელი, იმედითა და შესაძლებლობებით იყოს სავსე.
ამ პოზიციაზე მუშაობის მანძილზე, კომპლექსური პროექტების დაორგანიზებისას, რა თქმა უნდა, არაერთხელ ჰქონია ასეთი შემთხვევა, თუმცა სასურველი შედეგის მიღებისას ეს სირთულე უკვე გადალახულ დაბრკოლებად მოჩანს.
მან ასევე გაიხსენა ფრაზა ცნობილი ფილმიდან “ფორესტ გამპი” – ცხოვრება შოკოლადის ყუთივითაა, არასდროს იცი რა შეგხვდება. თუმცა, ეთოს სჯერა, რომ სამყაროს სწორედ ეს მოულოდნელობა სძენს მაგიურობას.
“ყველაფერი ხდება ცხოვრებაში, იმედგაცრუება, წარმატება, რაღაც გამოგვდის, რაღაც არა, მთავარია ჩვენი მაქსიმუმი ჩავდოთ ყველაფერში და მერე რაც იქნება იქნება, ბოლოს და ბოლოს იმის თქმას მაინც შევძლებთ, რომ ჩვენ ყველაფერი გავაკეთეთ ამისთვის.”
ეთომ სამომავლო გეგმებზე გვითხრა, რომ არაფერს გამორიცხავს და ყველაფერი შესაძლებელია. მარკეტინგისა და ბრენდინგის მიმართულებით მეტი ცოდნისა და უნარ-ჩვევების შეძენაზე მუშაობს. სჯერა, რომ პროცესში შეიძლება ძალიან ბევრ სიახლეს და გამოწვევას წააწყდეს, რაც, მისი პოზიციიდან გამომდინარე, სულაც არაა გასაკვირი.
თუ ეთოს ისტორიამ ჩვენი გუნდის წევრობაზე დაგაფიქრა, ბუს წერილს არ დაელოდო, ჩვენს ჰოგვორტსში მოხვედრა მარტივად შეგიძლია. გამოგვიგზავნე რეზიუმე აქ და შემოგვიერთდი – ერთად შევქმნათ ქალაქები ადამიანებისთვის.
