6 მარ. 2024
მიუსაფარი ცხოველების რიცხვი საქართველოში 30000-ზე მეტს აღწევს. ეს კი იმას ნიშნავს, რომ 30000-ზე მეტი ცხოველი ელოდება თბილ სახლს და მზრუნველ ოჯახს. რადგანაც ჩვენი მთავარი მისიაა შევქმნათ ქალაქები მათი მაცხოვრებლებისთვის, ხოლო ქალაქში თავს ისე უნდა გრძნობდე, როგორც საკუთარ სახლში, გადავწყვიტეთ ჩვენი ფუმფულა მეგობრებისთვის სახლები გვეჩუქებინა.
ორგანიზაცია Animal Project-თან ერთად ავარჩიეთ ის ლოკაციები, სადაც მიუსაფრებს განსაკუთრებით სჭირდებოდათ სახლი. სახლების დამზადების პროცესი საკმაოდ შრომატევადი აღმოჩნდა – საჭირო იყო ისეთი კონსტრუქცია შეგვექმნა, რომელიც კარგად გაუძლებდა წვიმას, ქარს და ყველა სხვა დაბრკოლებას წარმატებით გადაურჩებოდა. მაგრამ მთავარ მოტივაციას იმაზე ფიქრი გვაძლევდა, რომ ამ სახლში მიუსაფარი ცხოველი სითბოს იპოვიდა.
სახლების ლოკაციებზე განთავსების პროცესიც საკმაოდ დატვირთული და საინტერესო იყო. 14 წლის ბობიკა გავიცანით, რომელიც გვამხნევებდა და კამერასაც ძალიან მალე გაუშინაურდა.
ამჟამად თბილისის სხვადასხვა უბანში, 10 მისამართზე ჯადოსნური სახლები დგას. ჯადოსნური იმიტომ, რომ მათი ბინადრები ყველა სტუმარს სითბოთი და სიყვარულით ელოდებიან.
თუმცა, სტუმრები ხელცარიელები არ დაიშვებიან – საჭიროა მოფერება ან რამე გემრიელი გაიყოლოთ თან.
მისამართების ჩამონათვალი და სპეციალური რუკაც მოგიმზადეთ, უფრო მარტივად რომ მიაგნოთ მომლოდინე ცხოველებს:
სახლების მშენებლობა ამით არ სრულდება და რუკაზე თათებიც მალე გაბევრდება.
თბილ სახლს ყველა იმსახურებს. განსაკუთრებით ის, ვინც სიცივეს მარტო უმკლავდება. შევქმნათ ქალაქი ადამიანებისთვის… და ცუგებისთვის 🐾
