ბოლტ ფუდის ზოგადი პირობები კლიენტთან (ძალაშია 2026 წლის 14 ნოემბრიდან)

ბოლტ ფუდის ზოგადი პირობები კლიენტთან

განახლების თარიღი: ოქტომბერი, 2026

წინამდებარე ზოგადი პირობები ვრცელდება ბოლტსა და მომხმარებელს შორის ყველა ურთიერთობაზე, რომელიც დაკავშირებულია ბოლტ ფუდის პლატფორმის გამოყენებასთან (როგორც ეს ქვემოთ არის განსაზღვრული), აგრეთვე ბოლტ ფუდის პლატფორმის მეშვეობით დადებული ნასყიდობის ხელშეკრულებებისა და მიწოდების ხელშეკრულებების ცალკეულ ასპექტებზე (როგორც ეს ქვემოთ არის განსაზღვრული). ბოლტ ფუდის პლატფორმაზე რეგისტრაციით, მომხმარებელი ეთანხმება წინამდებარე ზოგადი პირობების გამოყენებასა და შინაარსს და ადასტურებს, რომ მომხმარებლის პერსონალური მონაცემები, რომლებიც მან წარადგინა რეგისტრაციისას ან რომლებიც შეგროვდა ბოლტ ფუდის პლატფორმის გამოყენების შედეგად, დამუშავდება მოქმედი კანონმდებლობისა და ბოლტის მიერ განსაზღვრული პერსონალური მონაცემების დამუშავების შესაბამისი პირობების, მათ შორის, კონფიდენციალურობის შესახებ შეტყობინების შესაბამისად. მომხმარებელი ასევე თანახმაა, რომ მისი მონაცემები შეიძლება გაზიარდეს ბოლტის სხვადასხვა პლატფორმებს შორის (მაგალითად, სამგზავრო პლატფორმასთან).

1. 1.

   განმარტებები

2. 2. სამართლებრივი ჩარჩო

1. 2.1. ბოლტ ფუდის პლატფორმა საშუალებას აძლევს კლიენტს შეუკვეთოს საქონელი პარტნიორებისგან და შეუკვეთოს ამ საქონლის მისთვის მიწოდება მიტანის ადგილზე.
2. 2.2. ბოლტ ფუდის პლატფორმის მეშვეობით საქონლის ნასყიდობისთვის, ნასყიდობის ხელშეკრულება იდება უშუალოდ კლიენტსა და პარტნიორს შორის. შეკვეთის მიწოდებისთვის, კლიენტი დებს მიწოდების ხელშეკრულებას უშუალოდ მიწოდების პარტნიორთან. იმ შემთხვევაში, თუ პარტნიორს სურს შესთავაზოს კლიენტს საკუთარი მიწოდების სერვისები საქონლის მიწოდების მიზნით, კლიენტი დებს მიწოდების ხელშეკრულებას უშუალოდ პარტნიორთან და წინამდებარე ზოგადი პირობების შესაბამისად მიწოდების პარტნიორებისადმი  დადგენილი პირობები მიწოდების ხელშეკრულებასთან დაკავშირებით გავრცელდება პარტნიორზე.  იმ შემთხვევაში, თუ კლიენტს სურს შეკვეთის მიწოდება მიწოდების პარტნიორის მიერ, ნასყიდობის ხელშეკრულება ითვლება დადებულად პარტნიორისა და მიწოდების პარტნიორის მიერ შეკვეთის მიღებისა და კლიენტისთვის შეკვეთის დადასტურების გაგზავნის მომენტიდან. კლიენტის მიერ შეკვეთის თავად  გატანის შემთხვევაში, ნასყიდობის ხელშეკრულება დადებულად ითვლება პარტნიორის მიერ შეკვეთის მიღებისა და კლიენტისთვის შეკვეთის დადასტურების გაგზავნის მომენტიდან.
3. 2.3. ბოლტ ფუდის პლატფორმისა და ვირტუალური ბაზრის ოპერირებისას, ბოლტი მოქმედებს მხოლოდ როგორც საინფორმაციო საზოგადოების მომსახურების მიმწოდებელი და არ არის ნასყიდობის ხელშეკრულების ან მიწოდების ხელშეკრულების მხარე. 
4. 2.4. ბოლტ ფუდის პლატფორმის გამოყენებით, კლიენტი ადასტურებს, რომ ყველა მიწოდების პარტნიორი და/ან პარტნიორი, რომელიც სთავაზობს თავის საქონელს და მომსახურებას ბოლტ ფუდის პლატფორმის მეშვეობით, უფლებამოსილებას ანიჭებს ბოლტს, რათა მან იმოქმედოს როგორც მიწოდების პარტნიორის და/ან პარტნიორის კომერციულმა აგენტმა ნებისმიერ მიწოდების ხელშეკრულებასთან და/ან ნასყიდობის ხელშეკრულებასთან დაკავშირებით. ბოლტს უფლება აქვს მოლაპარაკება აწარმოოს მიწოდების ხელშეკრულებაზე და/ან ნასყიდობის ხელშეკრულებაზე კლიენტთან, მათ შორის, შეზღუდვის გარეშე, მიიღოს მიწოდების საფასური და/ან საქონლის ღირებულება ან სხვა საფასური, რომელიც გადაიხადა კლიენტმა ან ბოლტის ბიზნეს მომხმარებელმა მიწოდების ხელშეკრულების და/ან ნასყიდობის ხელშეკრულების ფარგლებში, იმ შემთხვევაში, თუ ისინი გადახდილია აპლიკაციის მეშვეობით ან, სადაც გამოიყენება, ნაღდი ანგარიშსწორების გზით მიწოდების პარტნიორთან ან პარტნიორთან.
5. 2.5. ყველა პარტნიორი საქონლის წარმოებას ან რეალიზაციას, ხოლო ყველა მიწოდების პარტნიორი მიწოდების მომსახურების გაწევას ახორციელებს დამოუკიდებლად, როგორც ეკონომიკური და პროფესიული საქმიანობის განმახორციელებელი მომსახურების მიმწოდებელი.
6. 2.6. ბოლტ ფუდის პლატფორმა ხელმისაწვდომია მხოლოდ 16 წელს მიღწეული და მეტი ასაკის მომხმარებლებისთვის. მომხმარებელს არ შეუძლია გამოიყენოს ბოლტ ფუდის პლატფორმა, თუ იგი არ შეასრულებს ამ მოთხოვნას. ბოლტ ფუდის პლატფორმის გამოყენებით, მომხმარებლები, რომლებიც არიან არასრულწლოვნები, ადასტურებენ, რომ მათ მიიღეს მშობლის ან კანონიერი წარმომადგენლისგან ყველა საჭირო თანხმობა ბოლტ ფუდის პლატფორმაზე წვდომისა და გამოყენებისთვის. ბოლტი უშვებს ვარაუდს, რომ არასრულწლოვანებმა, რომლებიც იყენებენ ბოლტ ფუდის პლატფორმას, მიიღეს საჭირო თანხმობა მშობლებისგან ან კანონიერი წარმომადგენლისგან.
7. 2.7. ბოლტ ფუდის პლატფორმაზე ატვირთულ ნებისმიერ ინფორმაციაზე სრული პასუხისმგებლობა ეკისრება შესაბამის მიწოდების პარტნიორსა და პარტნიორს. აღნიშნულის მიუხედავად, ბოლტი უფლებამოსილია, ბოლტ ფუდის პლატფორმაზე სავარაუდოდ უკანონო ან არაზუსტი ინფორმაციის არსებობის შესახებ შეტყობინების მიღების შემდეგ, წაშალოს ასეთი ინფორმაცია.
8. 2.8. ბოლტი უფლებამოსილია, წინასწარი გაფრთხილების საფუძველზე და გონივრული ვადით, შეაჩეროს იმ მომხმარებლის მიერ წარდგენილი შეტყობინებებისა და საჩივრების განხილვა, რომელიც ბოლტ ფუდის პლატფორმაზე სავარაუდოდ უკანონო ინფორმაციის არსებობის შესახებ ხშირად წარადგენს აშკარად დაუსაბუთებელ შეტყობინებებს ან საჩივრებს. განხილვის შეჩერების საფუძვლების შეფასებისას ბოლტი ითვალისწინებს შემდეგ გარემოებებს:

1. 2.8.1. ერთი თვის განმავლობაში გამოვლენილი აშკარად უკანონო ინფორმაციის შემთხვევებისა და წარდგენილი აშკარად დაუსაბუთებელი შეტყობინებების ან საჩივრების საერთო რაოდენობას;
2. 2.8.2. ერთი თვის განმავლობაში წარდგენილი შეტყობინებებისა და საჩივრების შეფარდებას მიწოდებული ინფორმაციის ან წარდგენილი შეტყობინებების საერთო რაოდენობასთან;
3. 2.8.3. შეტყობინების წარდგენის მექანიზმების არამართლზომიერად გამოყენების სიმძიმეს; და
4. 2.8.4. შესაბამის შემთხვევაში, აშკარად დაუსაბუთებელი საჩივრების წარდგენისას მომჩივნის განზრახვას.

3. 3. საქონლის შეკვეთა ბოლტ ფუდის პლატფორმის გამოყენებით

1. 3.1. კლიენტს შეუძლია შეარჩიოს და შეუკვეთოს საქონელი ბოლტ ფუდის პლატფორმის მეშვეობით. იმ შემთხვევაში, თუ პარტნიორი ვერ მიაწვდის საქონელს შეკვეთის შესაბამისად, პარტნიორი არ დაადასტურებს შეკვეთას ბოლტ ფუდის პლატფორმაზე. პარტნიორს შეუძლია დაუკავშირდეს კლიენტს შეკვეთის ცვლილებებზე შეთანხმების მიზნით, რათა საქონლის ღირებულება იგივე დარჩეს. თუ შეთანხმება არ იქნება მიღწეული ან თუ კლიენტს მოუწევს ჩანაცვლებული საქონლისთვის იმაზე მეტი ან ნაკლები ღირებულების გადახდა, ვიდრე შეკვეთილი საქონლის ღირებულება იყო, შეკვეთა გაუქმდება და კლიენტს არ ჩამოეჭრება შეკვეთის საფასური ან (სადაც შესაძლებელია) შეკვეთის საფასური სრულად დაუბრუნდება.
2. 3.2. კლიენტს უფლება აქვს მიიღოს საქონელი, რომელიც შეესაბამება ბოლტ ფუდის პლატფორმაზე განთავსებულ აღწერილობას და ნებისმიერ კონკრეტულ მოთხოვნას (თუ ასეთი შეთანხმებულია). თუ საქონელი შეიცავს საკვებ პროდუქტს და კლიენტს აქვს ეჭვი, რომ აღნიშნულმა პროდუქტმა შესაძლოა გამოიწვიოს ალერგიული რეაქცია, კლიენტი უნდა დაუკავშირდეს პარტნიორს დამატებითი ინფორმაციის მისაღებად. ბოლტ ფუდის პლატფორმაზე განთავსებული საქონლის ფოტოები შესაძლოა სრულად არ შეესაბამებოდეს რეალურად შეთავაზებულ საქონელს.
3. 3.3. თუ გამოიყენება მინიმალური შეკვეთის ღირებულება და შეკვეთასთან დაკავშირებული საქონლის ღირებულება დაბალია მინიმალური შეკვეთის ღირებულებაზე, კლიენტს შეუძლია ასეთი შეკვეთის განთავსება და ბოლტ ფუდის პლატფორმა მას დაადასტურებს იმ პირობით, რომ კლიენტი გადაუხდის მცირე შეკვეთის საფასურს მიწოდების პარტნიორს.
4. 3.4. კლიენტი ვალდებულია დაიცვას მოქმედი კანონმდებლობის მოთხოვნები, მათ შორის, ალკოჰოლური სასმელების, თამბაქოს ნაწარმის, ენერგეტიკული სასმელების ან ნებისმიერი სხვა ისეთი პროდუქციის შეძენასთან დაკავშირებული მოთხოვნები, რომელთა რეალიზაციაც ექვემდებარება       ასაკობრივ შეზღუდვას ან მოითხოვს კლიენტის ასაკის შემოწმებას. იმ შემთხვევაში, თუ კლიენტს სურს შეუკვეთოს პროდუქცია, რომლის შეძენაც ექვემდებარება      ასაკობრივ შეზღუდვას, ის ვალდებულია   დაადასტუროს ან/და სათანადო წესით დაამტკიცოს თავისი ასაკი შეკვეთის განთავსების პროცესში.       ამასთან, მიწოდების პარტნიორი, რომელიც აწვდის შეკვეთას ან/და პარტნიორი, კლიენტის მიერ შეკვეთის თავად აღების შემთხვევაში, უფლებამოსილია უარი თქვას ასაკობრივ შეზღუდვას დაქვემდებარებული საქონლის კლიენტისათვის გადაცემაზე, თუ კლიენტი ვერ წარადგენს მოქმედ საიდენტიფიკაციო მოწმობას, რომლითაც დასტურდება, რომ მას მიღწეული აქვს  შესაბამისი პროდუქციის კანონიერად შეძენისთვის კანონმდებლობით დადგენილი ასაკი ან       თუ კლიენტი ავლენს ინტოქსიკაციის ნიშნებს. თუ ზემოაღნიშნული მიზეზების გამო, კლიენტს უარი ეთქვა ასაკობრივ შეზღუდვას დაქვემდებარებული პროდუქტ(ებ)ის მიწოდებაზე, ბოლტი უფლებამოსილია კლიენტს დააკისროს მიწოდების საფასურის ორმაგი ოდენობის გადახდა, ასაკობრივ შეზღუდვას დაქვემდებარებული პროდუქტ(ებ)ის პარტნიორისთვის უკან დაბრუნებასთან დაკავშირებული ხარჯების კომპენსირების მიზნით.
5. 3.5. კონკრეტული საქონლის აღწერაში მითითებული იქნება შესაბამისი პარტნიორის (მოვაჭრის) სახელწოდების, საიდენტიფიკაციო ნომრის, მისამართის, ელექტრონული ფოსტის, ტელეფონის ნომრების და პარტნიორის მიერ შემუშავებული დამატებითი პირობების  შესახებ ინფორმაცია (არსებობის შემთხვევაში), რომელთა მეშვეობითაც, კლიენტს შეეძლება პარტნიორთან კომუნიკაცია. ამასთან, ყველა პარტნიორი მომხმარებლისთვის წარმოდგენილია შესაბამისი რეიტინგული თანმიმდევრობით. პარტნიორების რეიტინგის განსაზღვრის ძირითადი პარამეტრებია:

3.5.1. პარტნიორის მომსახურებით სარგებლობის სიხშირე. თუ კლიენტმა ბოლო პერიოდში პარტნიორთან რამდენჯერმე განათავსა შეკვეთა, იზრდება ალბათობა იმისა, რომ პარტნიორი ბოლტ ფუდის პლატფორმაზე უფრო მაღალ პოზიციაზე განთავსდება.

3.5.2. მომხმარებელსა და პარტნიორს შორის მანძილი. რაც უფრო მცირეა მომხმარებელსა და პარტნიორს შორის მანძილი, მით უფრო მაღალია ალბათობა იმისა, რომ პარტნიორი ბოლტ ფუდის პლატფორმაზე უფრო მაღალ პოზიციაზე განთავსდება.

3.5.3. შეკვეთის მიწოდების სავარაუდო დრო (ETA). რაც უფრო მოკლეა პარტნიორის შეკვეთის მიწოდების სავარაუდო დრო, მით უფრო მაღალია ალბათობა იმისა, რომ პარტნიორი ბოლტ ფუდის პლატფორმაზე უფრო მაღალ პოზიციაზე განთავსდება.

3.5.4. მომხმარებლისათვის განსაზღვრული მიწოდების საფასური. რაც უფრო დაბალია მიწოდების საფასური, მით უფრო მაღალია ალბათობა იმისა, რომ პარტნიორი ბოლტ ფუდის პლატფორმაზე უფრო მაღალ პოზიციაზე განთავსდება.

3.5.5. პარტნიორის რეიტინგი. რაც უფრო მაღალია პარტნიორის რეიტინგი, მით უფრო მაღალია ალბათობა იმისა, რომ პარტნიორი ბოლტ ფუდის პლატფორმაზე უფრო მაღალ პოზიციაზე განთავსდება.

3.5.6. კლიენტის წინა შეკვეთებთან მსგავსება. პარტნიორი, რომელიც კლიენტის წინა შეკვეთების მსგავსი საქონლის შეთავაზებას ახორციელებს, უფრო მაღალი ალბათობით განთავსდება ბოლტ ფუდის პლატფორმაზე უფრო მაღალ პოზიციაზე.

4. 4. მიწოდების მომსახურების შეკვეთა ბოლტ ფუდის პლატფორმის გამოყენებით

1. 4.1. შეკვეთის განთავსებისას, კლიენტმა უნდა უზრუნველყოს მიწოდების პარტნიორის მიერ მიტანის სერვისის შეკვეთა ბოლტ ფუდის პლატფორმის მეშვეობით, რათა მოხდეს საქონლის მიწოდება მიტანის ადგილას ან, თუ ეს შესაძლებელია, აირჩიოს თავად გატანის ვარიანტი.
2. 4.2. მიწოდების ხელშეკრულების შესაბამისად, მიწოდების პარტნიორი შეკვეთის მიწოდებას განახორციელებს მიტანის ადგილზე. კლიენტი და მიწოდების პარტნიორი შეიძლება შეთანხმდნენ განსხვავებულ მიტანის ადგილზე, იმ პირობით, რომ ახალი მისამართი ახლოს იქნება თავდაპირველ მიტანის ადგილთან (არაუმეტეს 1 კმ-ის რადიუსში).
3. 4.3. კლიენტი უნდა იმყოფებოდეს მიტანის ადგილზე მინიმუმ ბოლტ ფუდის პლატფორმაზე მითითებული შეკვეთის მიწოდების სავარაუდო დროს. კლიენტი ხელმისაწვდომი უნდა იყოს ბოლტ ფუდის პლატფორმის მეშვეობით წარდგენილ ტელეფონის ნომერზე ზარების მისაღებად, ბოლტ ფუდის პლატფორმაზე შეკვეთის განთავსების მომენტიდან მიწოდების პარტნიორისგან შეკვეთის მიღებამდე.
4. 4.4. მიწოდების ნებისმიერი დრო ან სხვა სავარაუდო დრო, რომელიც კლიენტს ეცნობა მიწოდების პარტნიორის ან ბოლტის მიერ ბოლტ ფუდის პლატფორმის მეშვეობით, ატარებს საორიენტაციო ხასიათს და არ წარმოადგენს საქონლის აღნიშნულ დროს მიწოდების გარანტიას. შეკვეთების მიწოდების დროზე       შეიძლება გავლენა იქონიოს სხვადასხვა ფაქტორმა, როგორიცაა საცობები, პიკის საათები და მეტეოროლოგიური პირობები.
5. 4.5. იმ შემთხვევაში, თუ კლიენტი ირჩევს შეკვეთის თავად გატანის ოფციას, შეკვეთის გატანის მიზნით, კლიენტი პარტნიორის დაწესებულებაში უნდა მივიდეს ბოლტ ფუდის პლატფორმაზე შეკვეთის გატანისთვის მითითებულ საორიენტაციო დროს.
6. 4.6. პარტნიორების რეიტინგი ბოლტ ფუდის პლატფორმაზე ეფუძნება კლიენტების მიერ დატოვებულ მიმოხილვებს კლიენტისთვის შეკვეთის მიწოდების შემდეგ ან, შესაბამის შემთხვევაში, კლიენტის მიერ შეკვეთის გატანის შემდეგ. კლიენტი უფლებამოსილია შეაფასოს პარტნიორი 1-დან (ცუდი) 5-მდე (გამორჩეული) ქულის ფარგლებში და დატოვოს შესაბამისი მიმოხილვა. კლიენტს პარტნიორის შეფასების ან მის შესახებ მიმოხილვის დატოვების უფლება აქვს მხოლოდ  იმ შემთხვევაში, თუ კლიენტმა აღნიშნულ პარტნიორთან       ბოლტ ფუდის პლატფორმის მეშვეობით განათავსა შეკვეთა.

5. 5. საჩივრები

1. 5.1. თუ კლიენტს აქვს რაიმე პრეტენზია შეკვეთილ საქონელთან დაკავშირებით, კლიენტს ეძლევა რეკომენდაცია აღნიშნულის თაობაზე აცნობოს ბოლტს, ბოლტ ფუდის პლატფორმის მეშვეობით, წინამდებარე ზოგადი პირობებით განსაზღვრული წესის შესაბამისად. ბოლტი უფლებამოსილია კლიენტს მოსთხოვოს საქონლის ფოტოსურათის ან სხვა მტკიცებულების წარდგენა ან საჩივართან დაკავშირებული გარემოებების განმარტება.
2. 5.2. მიუხედავად იმისა, რომ ბოლტი არ წარმოადგენს საქონლის მწარმოებელს ან მოვაჭრეს, აგრეთვე მიწოდების მომსახურების მიმწოდებელს, თუ შესაბამის შეკვეთასთან დაკავშირებით წარმოიშობა კლიენტისთვის თანხის დაბრუნების ვალდებულება, აღნიშნული თანხა შესაბამისად დაბრუნდება.
3. 5.3. კლიენტი ასევე უფლებამოსილია საქონელთან ან მიწოდების მომსახურებასთან დაკავშირებული პრეტენზია ან საჩივარი უშუალოდ წარუდგინოს პარტნიორს ან მიწოდების პარტნიორს.
4. 5.4. კლიენტს შეუძლია დაუკავშირდეს ბოლტის მომხმარებელთა მხარდაჭერის გუნდს ბოლტ ფუდის პლატფორმაზე ხელმისაწვდომი ჩატის ფუნქციის მეშვეობით, სადაც კლიენტს შეუძლია ნახოს ღია ჩატები და კომუნიკაციის ისტორია, თარიღისა და დროის მითითებით, ჩატის შექმნის დღიდან 6 თვის განმავლობაში.

6. 6. გადახდები და ინვოისები

1. 6.1. კლიენტი ვალდებულია გადაუხადოს პარტნიორს საქონლის ღირებულება ბოლტ ფუდის პლატფორმაზე მითითებული ოდენობით. ბოლტ ფუდის პლატფორმაზე მითითებული საქონლის ღირებულება შეიძლება განსხვავდებოდეს პარტნიორის დაწესებულებაში იმავე საქონლისთვის განსაზღვრული ფასისგან. საქონლის ღირებულება ბოლტ ფუდის პლატფორმაზე  შეიძლება პერიოდულად შეიცვალოს შეკვეთის განთავსებამდე.
2. 6.2. კლიენტი ვალდებულია მიწოდების პარტნიორს მიწოდების საფასური            ბოლტ ფუდის პლატფორმის მიერ გამოთვლილი ოდენობით. მიწოდების საფასური გამოითვლება მიტანის დროის, მიწოდების მარშრუტის სიგრძის, მიწოდების საშუალებების და სხვა კრიტერიუმების გათვალისწინებით. გადასახდელი მიწოდების საფასურის ოდენობა კლიენტს ეცნობება შეკვეთის დადასტურებამდე. მიწოდების საფასურის გარდა, კლიენტს ასევე შეუძლია მიწოდების პარტნიორს გადაუხადოს ბონუსი ბოლტ ფუდის პლატფორმის მეშვეობით. მიწოდების საფასურის გაანგარიშების დეტალები შეიძლება დროდადრო დარეგულირდეს ბოლტ ფუდის პლატფორმის მიერ ბაზრის მდგომარეობის, ვირტუალურ ბაზარზე მიწოდების პარტნიორების ხელმისაწვდომობისა და სერვისთან დაკავშირებული სხვა ფაქტორების გათვალისწინებით. მიწოდების საფასური შეიძლება მოიცავდეს სხვადასხვა ტიპის საკომისიოს (მომსახურების საფასურის ჩათვლით).
3. 6.3. ბოლტი უფლებამოსილია განსაზღვროს მინიმალური შეკვეთის ღირებულება წინამდებარე ზოგადი პირობების 3.3. პუნქტის შესაბამისად. ასეთ შემთხვევებში, კლიენტი ვალდებულია მცირე შეკვეთის საფასური გადაუხადოს მიწოდების პარტნიორს.
4. 6.4. ბოლტი, რომელიც მოქმედებს როგორც პარტნიორის და მიწოდების პარტნიორის კომერციული აგენტი, უფლებამოსილია პარტნიორის სახელით მოამზადოს და კლიენტზე გასცეს საქონლის ღირებულების საინფორმაციო ქვითრები, ხოლო მიწოდების პარტნიორის სახელით -  მიწოდების საფასურთან და (შესაბამის შემთხვევაში), მცირე შეკვეთის საფასურთან და/ან ბონუსებთან დაკავშირებული საინფორმაციო ქვითრები და მიიღოს კლიენტის გადახდა სალარო აპარატის ქვითრების მეშვეობით პარტნიორისა და მიწოდების პარტნიორის სახელით.
5. 6.5. ყველა გადახდა მუშავდება კლიენტის საგადახდო ბარათიდან ან კლიენტის მიერ ბოლტ ფუდის პლატფორმაზე გააქტიურებული გადახდის სხვა მეთოდებიდან, გარდა ნაღდი ანგარიშსწორებისა. გადახდები მუშავდება მესამე პირის - საგადახდო მომსახურების პროვაიდერის მიერ. შეკვეთის დადასტურებისთანავე კლიენტი ახდენს გადახდის ავტორიზებას საკუთარი საგადახდო ბარათის მეშვეობით ან სხვა შესაბამისი გადახდის მეთოდის გამოყენებით, შეკვეთის საფასურის ოდენობით, რის საფუძველზეც შესაბამისი თანხა რეზერვდება საგადახდო ბარათზე ან გადახდის სხვა საშუალებებზე. შეკვეთასთან დაკავშირებული გადახდა სრულდება და შესაბამისი თანხა კლიენტის საგადახდო ბარათიდან ან გადახდის სხვა საშუალებიდან ჩამოიჭრება შეკვეთის დადასტურებიდან 72 საათის განმავლობაში.
6. 6.6. კლიენტის გადახდის ვალდებულებები, რომლებიც გამომდინარეობს ნასყიდობის ხელშეკრულებიდან და მიწოდების ხელშეკრულებიდან (ასეთის არსებობის შემთხვევაში) შესრულებულად ითვლება, შესაბამისად, პარტნიორისა და მიწოდების პარტნიორის მიმართ (ასეთის არსებობის შემთხვევაში), როდესაც გადახდა შესრულებულია ბოლტისთვის და შესაბამისი თანხა ჩამოჭრილია კლიენტის საგადახდო ბარათიდან ან გადახდა განხორციელებულია სხვა დასაშვები გადახდის მეთოდით (მაგ. ბოლტ ბიზნესის ფუნქციით) ან, როდესაც კლიენტმა შეკვეთის საფასური სრულად გადაიხადა მიწოდების პარტნიორთან ნაღდი ანგარიშსწორებით შეკვეთის მიტანისას ან კლიენტმა გადაუხადა შეკვეთის საფასური უშუალოდ პარტნიორს, თვითგატანის სერვისით სარგებლობის შემთხვევაში. თუ შეკვეთის საფასურის დარეზერვება შეუძლებელია კლიენტის საგადახდო ბარათზე, შეკვეთა პარტნიორს არ გადაეგზავნება, გარდა იმ შემთხვევისა, როდესაც კლიენტი ირჩევს ნაღდი ანგარიშსწორებით გადახდას მიწოდების პარტნიორის მიერ შეკვეთის მიტანისას ან თვითგატანის სერვისით სარგებლობის შემთხვევაში - თანხის უშუალოდ პარტნიორთან გადახდას.
7. 6.7. ბოლტმა შეიძლება კლიენტს შესთავაზოს შეკვეთის საფასურის ნაღდი ანგარიშსწორებით გადახდის შესაძლებლობა, რომლის გამოყენების შემთხვევაშიც კლიენტი შესაბამის თანხას უშუალოდ მიწოდების პარტნიორს გადაუხდის შეკვეთის მიტანისას. ასეთ შემთხვევაში, კლიენტი ვალდებულია შეკვეთის საფასური გადაიხადოს მიწოდების პარტნიორთან ნაღდი ანგარიშსწორებით, შეკვეთის კლიენტის მიერ მითითებულ ადგილზე მიტანისას. ბოლტი უფლებამოსილია, თავისი შეხედულებისამებრ, კონკრეტული კლიენტისთვის შეზღუდოს ნაღდი ანგარიშსწორება.
8. 6.8. ნაღდი ანგარიშსწორების შემთხვევაში, მიწოდების პარტნიორი ვალდებულია ნაღდი ანგარიშსწორებით მიღებული თანხა ასახოს ბოლტ ფუდის პლატფორმაზე.
9. 6.9. იმ შემთხვევაში, თუ პროდუქტები (ანუ საქონელი) იყიდება წონის მიხედვით, ბოლტ ფუდის პლატფორმაზე ასეთ პროდუქტთან დაკავშირებით მითითებული ფასი წარმოადგენს       პარტნიორის მიერ განსაზღვრულ მხოლოდ სავარაუდო ფასს. წონით გასაყიდი პროდუქტის საბოლოო ფასი განისაზღვრება შეკვეთის ფარგლებში და კლიენტს შესაბამისი თანხა დაეკისრება შეკვეთით მიღებული პროდუქტის რეალური წონის მიხედვით. წონის ცვალებადობით გამოწვეული ფასის შესაძლო სხვაობის დასაფარად, ბოლტი უფლებამოსილია  კლიენტის გადახდის ბარათზე დროებით დააკავოს თანხა. დროებით დაკავებული თანხის ოდენობა იქნება კლიენტის შეკვეთაში შემავალი წონით გასაყიდი პროდუქტების ღირებულების არაუმეტეს 20%. იმ შემთხვევაში, თუ შეკვეთილი პროდუქტის ფაქტობრივი წონა ნაკლებია შეკვეთის დადასტურებისას მითითებულ წონაზე, ბოლტი დაუბრუნებს კლიენტს შესაბამისი ფასის სხვაობას. იმ შემთხვევაში, თუ შეკვეთილი პროდუქტის ფაქტობრივი წონა აღემატება შეკვეთის დადასტურებისას მითითებულ წონას, ბოლტი კლიენტს დააკისრებს ფასის სხვაობას კლიენტის გადახდის ბარათზე დაკავებული თანხიდან. დროებით დაკავებული თანხის ის ნაწილი, რომელიც არ იქნება საჭირო ფასის კორექტირებისთვის, დაბრუნდება კლიენტის საგადახდო ბარათზე.
10. 6.10. ბოლტი  უფლებამოსილია, თავისი შეხედულებისამებრ, გააკეთოს სარეკლამო შეთავაზებები და ფასდაკლებები საქონლის ღირებულებასთან ან მიწოდების საფასურთან დაკავშირებით.
11. 6.11. წინამდებარე ზოგად პირობებზე დათანხმებით, კლიენტი აცხადებს თანხმობას ელექტრონული ინვოისების მიღებაზე. ელექტრონული ინვოისი შესაძლოა გაიცეს და მიეწოდოს კლიენტს ნებისმიერი ელექტრონული ფორმით, მათ შორის ელექტრონული ფოსტის მეშვეობით, PDF ფორმატის დოკუმენტის სახით.

7. 7. შეკვეთის გაუქმება, გამოყენების უფლების გაუქმება და შეჩერება

1. 7.1. კლიენტი უფლებამოსილია გააუქმოს შეკვეთა, თუ ბოლტ ფუდის პლატფორმა ამის შესაძლებლობას იძლევა, ამავე პლატფორმით გათვალისწინებული პირობების შესაბამისად. გარდა ამისა, შეკვეთა ასევე შეიძლება გაუქმდეს ბოლტის, პარტნიორის და/ან მიწოდების პარტნიორის მიერ, რა შემთხვევაშიც, კლიენტს უფლება აქვს სრულად დაიბრუნოს თანხა, გარდა წინამდებარე ზოგადი პირობების 3.4. და 7.2. პუნქტებით გათვალისწინებული შემთხვევებისა.
2. 7.2. ბოლტი, მიწოდების პარტნიორის სახელით, უფლებამოსილია გააუქმოს შეკვეთა და კლიენტს დააკისროს შეკვეთის სრული საფასურის გადახდა, თუ:

1. 7.2.1. კლიენტი მიუწვდომელია მიტანის ადგილზე მიწოდების პარტნიორის მისვლიდან 5 წუთის განმავლობაში; და
2. 7.2.2. მიწოდების პარტნიორი, კლიენტის მიერ მითითებულ ტელეფონის ნომერზე ორჯერ დაკავშირების მცდელობის მიუხედავად, ვერ შეძლებს კლიენტთან დაკავშირებას; ან
3. 7.2.3. კლიენტი და მიწოდების პარტნიორი ვერ შეთანხმდებიან შეკვეთის მიტანის ახალ მისამართზე წინამდებარე ზოგადი პირობების 4.2. პუნქტის შესაბამისად.

3. 7.3. ბოლტი უფლებამოსილია დაუყოვნებლივ, დროებით შეუჩეროს კლიენტს  ბოლტ ფუდის პლატფორმაზე წვდომა ან შეუწყვიტოს წინამდებარე ზოგადი პირობები და/ან უარი თქვას ნებისმიერი შეკვეთის შესრულებაზე ან გააუქმოს      შეკვეთა, თუ კლიენტი ბოროტად იყენებს ან ზიანს აყენებს ბოლტ ფუდის პლატფორმას, თუ ბოლტს აქვს გონივრული საფუძველი, ივარაუდოს, რომ კლიენტი ბოლტ ფუდის პლატფორმის გამოყენებისას ახორციელებს ან ცდილობს განახორციელოს თაღლითური ქმედება ან თუ კლიენტი სხვაგვარად არ ასრულებს წინამდებარე ზოგადი პირობებით გათვალისწინებულ ვალდებულებებს (მაგ. რამდენჯერმე არ იმყოფებოდა მიტანის ადგილზე, წინამდებარე ზოგადი პირობების 7.2. პუნქტის მიხედვით). ბოლტ ფუდის პლატფორმაზე მომხმარებლის პროფილის შეჩერება ან შეწყვეტა ასევე იწვევს კლიენტის წვდომის შეჩერებას ან შეწყვეტას ბოლტის სხვა პლატფორმებზეც (მაგ. სამგზავრო პლატფორმაზე).
4. 7.4. კლიენტმა არ უნდა გამოიყენოს ბოლტ ფუდის პლატფორმა ფულის გათეთრების ან ნებისმიერი სხვა დანაშაულებრივი საქმიანობის განხორციელების მიზნით (როგორც ამას განსაზღვრავს ბოლტი საკუთარი შეხედულებისამებრ). კლიენტის  მიერ წინამდებარე 7.4. პუნქტის დარღვევის შემთხვევაში, ბოლტი შეუწყვეტს კლიენტს წინამდებარე ზოგად პირობებს და       აცნობებს შესაბამის სამართალდამცავ ორგანოებს.

8. 8. ლიცენზია, ინტელექტუალური საკუთრების უფლებები და მონაცემთა დამუშავება

1. 8.1. ბოლტ ფუდის პლატფორმაზე რეგისტრაციის შედეგად, ბოლტი მომხმარებელს ანიჭებს გამოხმობად, არაექსკლუზიურ, არაგადაცემად, არაქველიცენზირებად ლიცენზიას, გამოიყენოს ბოლტ ფუდის პლატფორმა საქონლის შეკვეთისა და შეკვეთების მიწოდების მომსახურებით სარგებლობის მიზნით.
2. 8.2. ყველა ინტელექტუალური საკუთრების უფლება პროგრამულ უზრუნველყოფაზე, დოკუმენტაციასა ან ინფორმაციასთან დაკავშირებით, რომელიც გამოიყენება  ან შემუშავდა ბოლტის მიერ ან მისი სახელით, საინფორმაციო საზოგადოების მომსახურების მიწოდების დროს წინამდებარე ზოგადი პირობების (მათ შორის, ბოლტ ფუდის პლატფორმა და მასში ატვირთული ნებისმიერი მასალა) შესაბამისად, ეკუთვნის ბოლტს (ან შესაბამის შემთხვევებში, შესაბამისი უფლებების ფარგლებში - პარტნიორს). მომხმარებელმა არ უნდა დააკოპიროს, შეცვალოს, ადაპტირება მოახდინოს, განახორციელოს რევერსული ინჟინერია, მოახდინოს დანაწევრება ან სხვაგვარად აღმოაჩინოს ბოლტ ფუდის პლატფორმის ან სხვა პროგრამული უზრუნველყოფის, რომელსაც იყენებს ბოლტი საწყისი კოდი ან ამოიღოს ან გამოიყენოს რაიმე მონაცემი ბოლტ ფუდის პლატფორმაზე კომერციული მიზნებისთვის ან სხვა მიზნით, გარდა საქონლის შეკვეთასთან დაკავშირებული მიზნისა. მომხმარებელი უფლებამოსილია ბოლტ ფუდის პლატფორმა გამოიყენოს მხოლოდ თავისი პირადი, არაკომერციული მიზნებისთვის, გარდა ბოლტ ბიზნესის ფუნქციონალის გამოყენების შემთხვევისა.
3. 8.3. ბოლტის მიერ მომხმარებლებისა და კლიენტების პერსონალური მონაცემების დამუშავების წესი და პირობები განისაზღვრება კონფიდენციალურობის პოლიტიკით, რომელიც ხელმისაწვდომია ბოლტ ფუდის პლატფორმის შემდეგი ბმულის მეშვეობით: https://bolt.eu/ka-ge/privacy/delivery/privacy-for-eaters/.
4. 8.4. ბოლტი არ იძლევა რაიმე სახის გარანტიას, უზრუნველყოფას ან განცხადებას ბოლტ ფუდის პლატფორმის ხარისხთან დაკავშირებით, მათ შორის, აშკარა ან ფარული ნაკლის არარსებობის, ჩვეულებრივი ან კონკრეტული (სპეციალური) მიზნისთვის ვარგისიანობის თაობაზე, და ბოლტი არ არის ვალდებული დააკმაყოფილოს მომხმარებლის მოთხოვნები, რომლებიც დაკავშირებულია ბოლტ ფუდის პლატფორმის ხარისხთან, გარდა წინამდებარე ზოგადი პირობებით და მოქმედი კანონმდებლობით გათვალისწინებული შემთხვევებისა.
5. 8.5. მომხმარებლებს პირდაპირ ეკრძალებათ ბოლტ ფუდის პლატფორმიდან  მონაცემების ნებისმიერი ფორმით (მექანიკური ან ავტომატიზებული) ამოღება,      მოპოვება ან შეგროვება, მათ შორის, კომპიუტერული ბოტების, ე.წ. ობობების, მცოცავების ან ნებისმიერი სხვა ავტომატიზებული საშუალების გამოყენებით.

9. 9. პასუხისმგებლობა

1. 9.1. მხოლოდ პარტნიორი არის პასუხისმგებელი ნასყიდობის ხელშეკრულებით ნაკისრი ვალდებულებების ჯეროვან შესრულებაზე და შეკვეთილი საქონლის ხარისხზე, რაოდენობაზე      ან ნებისმიერ სხვა ნაკლზე ან შეუსაბამობაზე.       ბოლტი კლიენტის წინაშე არ არის პასუხისმგებელი პარტნიორის მიერ ნასყიდობის ხელშეკრულებით ნაკისრი ვალდებულებების შეუსრულებლობის ან არაჯეროვანი შესრულებისათვის (მათ შორის, საქონლის მოხმარებით გამოწვეული  ალერგიული რეაქციების ან ჯანმრთელობასთან დაკავშირებული სხვა პრობლემების გამო). აღნიშნულის მიუხედავად, თუ წინამდებარე ზოგადი პირობების ან მოქმედი კანონმდებლობის შესაბამისად კლიენტს წარმოეშობა გადახდილი თანხის სრულად ან ნაწილობრივ დაბრუნების უფლება, შესაბამისი თანხის დაბრუნებას უზრუნველყოფს ბოლტი, როგორც პარტნიორის სახელით მოქმედი კომერციული აგენტი.
2. 9.2.  ბოლტი ასევე არ წარმოადგენს მიწოდების პარტნიორის მიერ მიწოდების მომსახურების გაწევაზე პასუხისმგებელ პირს. აღნიშნულის მიუხედავად, თუ წინამდებარე ზოგადი პირობების ან მოქმედი კანონმდებლობის შესაბამისად კლიენტს წარმოეშობა გადახდილი თანხის სრულად ან ნაწილობრივ დაბრუნების უფლება, შესაბამისი თანხის დაბრუნებას უზრუნველყოფს ბოლტი. ბოლტის მიერ თანხის დაბრუნება ემსახურება მომხმარებელთა კმაყოფილების მაღალი სტანდარტის უზრუნველყოფას და არ უნდა იქნეს განმარტებული ბოლტის, როგორც საინფორმაციო საზოგადოების მომსახურების მიმწოდებლისა და შუამავალი პლატფორმის ოპერატორის სტატუსის, როლის ან პასუხისმგებლობის ფარგლების ცვლილება.
3. 9.3. ბოლტი პასუხისმგებელია ბოლტ ფუდის პლატფორმის გაუმართაობით გამოწვეულ ნებისმიერ ზიანზე, თუ ასეთი გაუმართაობა იწვევს კლიენტის უფლებ(ებ)ის დარღვევას „მომხმარებლის უფლებების დაცვის შესახებ“ და „ელექტრონული კომერციის შესახებ“ საქართველოს კანონების შესაბამისად.  ამასთან, ბოლტი უფლებამოსილია თავისი შეხედულებისამებრ დანერგოს ახალი და/ან შეწყვიტოს არსებული ფუნქციების გამოყენება ბოლტ ფუდის პლატფორმაზე. ბოლტი კლიენტს შეატყობინებს ასეთი ცვლილების შესახებ.
4. 9.4. თუ მომხმარებელს აქვს ეჭვი, რომ მის ბოლტ ფუდის პლატფორმის   ანგარიშთან დაკავშირებული საგადახდო ბარათი მოპარულია და/ან თაღლითურად გამოიყენება მესამე პირის მიერ, მომხმარებელი  ვალდებულია აღნიშნულის შესახებ დაუყოვნებლივ აცნობოს ბოლტს. ასეთი შეტყობინების მიღებამდე, ბოლტი არ არის პასუხისმგებელი მომხმარებლის ანგარიშის ფარგლებში მესამე პირების მიერ მომხმარებლის საგადახდო ბარათის ნებისმიერ თაღლითურ გამოყენებაზე.
5. 9.5. ბოლტ ფუდის პლატფორმა მომხმარებელს მიეწოდება მკაცრად „როგორც არის“ პრინციპით. ბოლტი არ არის პასუხისმგებელი ბოლტ ფუდის პლატფორმის მუშაობის შეფერხებაზე, კავშირის შეცდომებზე, ხელმიუწვდომლობაზე ან გაუმართაობაზე; თუმცა, ბოლტი არ ზღუდავს კლიენტის უფლებას, მოითხოვოს ზიანის ანაზღაურება ან გამოიყენოს კანონმდებლობით გათვალისწინებული სხვა სამართლებრივი დაცვის საშუალებები, თუ ბოლტ ფუდის პლატფორმის მომსახურებები არ შეესაბამება წინამდებარე ზოგად პირობებს. ამასთან, ბოლტი უფლებამოსილია, თავისი შეხედულებისამებრ, ბოლტ ფუდის პლატფორმაზე დანერგოს ახალი და/ან შეწყვიტოს არსებული ფუნქციების გამოყენება. ბოლტი შესაბამისი ფუნქციების შეწყვეტის შესახებ სათანადოდ აცნობებს კლიენტებს.
6. 9.6. მომხმარებელი აცნობიერებს, რომ სმარტფონის ან ნებისმიერი სხვა მოწყობილობის რუთინგი (rooting), ჯეილბრეიქინგი (jailbreaking) ან ტექნიკური უზრუნველყოფის ან ოპერაციული სისტემის დონეზე ნებისმიერი ისეთი ცვლილების განხორციელება, რომელიც ეწინააღმდეგება მწარმოებლის ინსტრუქციებს, მოწყობილობას კიბერსაფრთხეების მიმართ უფრო მოწყვლადს ხდის. გარდა ამისა, მომხმარებელი აცნობიერებს, რომ დაუშვებელია ყალბი მოწყობილობებისა და სხვა ისეთი საშუალებების გამოყენება, რომლებიც ცდილობენ ბოლტის სისტემებთან კომუნიკაციას. მომხმარებელი ასევე აცნობიერებს, რომ ბოლტი არ არის პასუხისმგებელი რაიმე ზიანზე, რომელიც დაკავშირებულია ასეთი შეცვლილი მოწყობილობის, ყალბი მოწყობილობების ან სხვა მსგავსი საშუალებების გამოყენებასთან, და რომ ბოლტს არ ეკისრება რაიმე ვალდებულება, მხარი დაუჭიროს ასეთი მოწყობილობის გამოყენებას.

10. 10. პარტნიორის ვალდებულებები

1. 10.1. პარტნიორი ვალდებულია უზრუნველყოს, რომ კლიენტისთვის მიწოდებული საქონელი შეესაბამებოდეს ბოლტ ფუდის პლატფორმაზე მითითებულ აღწერილობას და ჰქონდეს ამავე პლატფორმაზე განსაზღვრული მახასიათებლები.
2. 10.2. საქონლის ნაკლის შემთხვევაში კლიენტი უფლებამოსილია პარტნიორს მოსთხოვოს ნაკლის აღმოფხვრა (საქონლის უსასყიდლოდ შეცვლა ან ფასის შემცირება) ან უარი თქვას ნასყიდობის ხელშეკრულებაზე. კლიენტს არ აქვს უფლება, უარი თქვას ნასყიდობის ხელშეკრულებაზე, თუ საქონლის ნაკლი უმნიშვნელოა.
3. 10.3. საქონლის შეცვლის მოთხოვნის უფლება კლიენტის პირველი რიგის უფლებაა. კლიენტი უფლებამოსილია პარტნიორს მოსთხოვოს საქონლის უსასყიდლოდ შეცვლა, გარდა იმ შემთხვევისა, როდესაც საქონლის ბუნებიდან გამომდინარე მისი შეცვლა შეუძლებელია ან ეს არათანაზომიერ ან შეუსაბამოდ დიდ ხარჯს მოითხოვს. საქონლის უსასყიდლოდ შეცვლა გულისხმობს პარტნიორის მიერ ყველა იმ ხარჯის (მათ შორის, ფოსტის, სამუშაო ძალასა და მასალების ხარჯების) გაწევას, რომლებიც საჭიროა საქონლის ბოლტ ფუდის პლატფორმაზე მითითებულ აღწერილობასთან შესაბამისობის უზრუნველსაყოფად.
4. 10.4. საქონლის შეცვლა უნდა განხორციელდეს გონივრულ ვადაში და ისე, რომ კლიენტს არ შეექმნას მნიშვნელოვანი შეფერხება საქონლის ბუნებისა და იმ მიზნის გათვალისწინებით, რომლისთვისაც მან ეს საქონელი შეიძინა.
5. 10.5. კლიენტი უფლებამოსილია მოითხოვოს საქონლის ღირებულების შემცირება ან უარი თქვას ნასყიდობის ხელშეკრულებაზე, თუ არსებობს ერთ-ერთი შემდეგი გარემოება:

10.5.1. საქონლის შეცვლა შეუძლებელია;

10.5.2. პარტნიორმა საქონელი გონივრულ ვადაში არ შეცვალა და კლიენტმა დაკარგა ნასყიდობის ხელშეკრულების შესრულებისადმი ინტერესი;

10.5.3. პარტნიორის მიერ საქონლის შეცვლა კლიენტს მნიშვნელოვან შეფერხებას შეუქმნის.

6. 10.6. ნასყიდობის ხელშეკრულებაზე უარის თქმის შემთხვევაში კლიენტი უფლებამოსილია საქართველოს კანონმდებლობით დადგენილი წესით მოითხოვოს ნასყიდობის ხელშეკრულების შეუსრულებლობით გამოწვეული ზიანის ანაზღაურება.
7. 10.7. კლიენტი უფლებამოსილია ისარგებლოს ზემოაღნიშნული უფლებებით, თუ საქონლის ნაკლი გამოვლინდა კლიენტისთვის საქონლის გადაცემიდან 2 წლის განმავლობაში.
8. 10.8. თუ კლიენტმა საქონლის ნაკლი საქონლის მფლობელობაში მიღებიდან 6 თვის განმავლობაში აღმოაჩინა, საწინააღმდეგოს დამტკიცებამდე იგულისხმება, რომ ნაკლი არსებობდა საქონლის მიწოდებისას, თუ საქონლის ბუნებიდან ან ნაკლის ხასიათიდან გამომდინარე, ეს შესაძლებელია. ამ შემთხვევაში მტკიცების ტვირთი ეკისრება პარტნიორს. თუ კლიენტმა საქონლის ნაკლი საქონლის მფლობელობაში მიღებიდან 6 თვის შემდეგ აღმოაჩინა, იმის მტკიცების ტვირთი, რომ ნაკლი არსებობდა საქონლის მიწოდებისას, ეკისრება კლიენტს.

11. 11. მომხმარებლის უფლებები და კანონისმიერი გარანტიები

1. 11.1. ხარვეზიანი შუალედური (ელექტრონული) მომსახურება. თუ ბოლტის აპლიკაციის ან ბოლტ ფუდის პლატფორმის ხარვეზი ან ტექნიკური გაუმართაობა არსებითად ზღუდავს ან ხელს უშლის თქვენს შესაძლებლობას, განათავსოთ ან დაასრულოთ შეკვეთა, თქვენ გაქვთ შემდეგი უფლებები:

1. 11.1.1. ხარვეზის აღმოფხვრის მოთხოვნის უფლება. თქვენ უფლება გაქვთ ბოლტს მოსთხოვოთ ხარვეზის უსასყიდლოდ აღმოფხვრა, გარდა იმ შემთხვევისა, როდესაც ხარვეზის აღმოფხვრა შეუძლებელია ან მოითხოვს არათანაზომიერ ძალისხმევას ან შეუსაბამოდ დიდ ხარჯს. ხარვეზი უნდა აღმოიფხვრას გონივრულ ვადაში და ისე, რომ თქვენ არ შეგექმნათ მნიშვნელოვანი შეფერხება. ხარვეზის აღმოსაფხვრელად დამატებითი ვადის განსაზღვრა საჭირო არ არის, თუ აშკარაა, რომ ხარვეზის აღმოფხვრა შედეგს ვერ გამოიღებს, ან თუ თქვენთვის არსებითი მნიშვნელობა ჰქონდა შუალედური (ელექტრონული) მომსახურების დროულად გაწევას.
2. 11.1.2. ფასის შემცირების ან ხელშეკრულებიდან გასვლის უფლება. თუ ხარვეზი გონივრულ ვადაში არ აღმოიფხვრა, მისი აღმოფხვრა შეუძლებელია ან ის თქვენთვის მნიშვნელოვან შეფერხებას ქმნის, თქვენ უფლება გაქვთ მოითხოვოთ შუალედური (ელექტრონული) მომსახურების ფასის შესაბამისი შემცირება ან უარი თქვათ ბოლტთან დადებულ ხელშეკრულებაზე და მოითხოვოთ ზიანის ანაზღაურება საქართველოს მოქმედი კანონმდებლობის შესაბამისად.
3. 11.1.3. მომსახურების დაგვიანება და შესრულებისადმი ინტერესის დაკარგვა. თუ ბოლტი დროულად არ დაიწყებს შუალედური (ელექტრონული) მომსახურების გაწევას ან მომსახურების გაწევა არაგონივრულად გაჭიანურდება ისე, რომ მისი შეთანხმებულ ვადაში შესრულება შეუძლებელი გახდება და თქვენ დაკარგავთ ინტერესს ნაწილობრივი შესრულების მიმართ, ბოლტი არ იქნება უფლებამოსილი მოითხოვოს შუალედური (ელექტრონული) მომსახურების საფასურის ან აღნიშნული მომსახურების გაწევასთან დაკავშირებული ხარჯების ანაზღაურება.
4. 11.1.4. მოქმედების ფარგლების შეზღუდვა. წინამდებარე პუნქტით გათვალისწინებული უფლებები ვრცელდება მხოლოდ ბოლტის მიერ გაწეული შუალედური (ელექტრონული) მომსახურების ხარვეზებზე და არ ვრცელდება პარტნიორის, მიწოდების პარტნიორის ან მესამე პირის მიერ გამოწვეულ ხარვეზებზე.

2. 11.2. ხელშეკრულებასთან შეუსაბამო საქონელი. თუ თქვენთვის მიწოდებული საქონელი არ შეესაბამება ნასყიდობის ხელშეკრულებას და ასეთი შეუსაბამობა არ არის უმნიშვნელო, პარტნიორის მიმართ გაქვთ შემდეგი უფლებები:

5. 11.2.1. შეუსაბამობის აღმოფხვრის მოთხოვნის უფლება. თქვენ უფლება გაქვთ მოსთხოვოთ პარტნიორს შეუსაბამობის უსასყიდლოდ აღმოფხვრა - საქონლის შეცვლის ან, შესაბამის შემთხვევაში, ნაკლის გამოსწორების გზით - გონივრულ ვადაში, გარდა იმ შემთხვევისა, როდესაც ეს შეუძლებელია ან მოითხოვს არათანაზომიერ ან შეუსაბამოდ დიდ ხარჯს. დამატებითი ვადის განსაზღვრა საჭირო არ არის, თუ აშკარაა, რომ ნაკლის აღმოფხვრა შედეგს ვერ გამოიღებს, ან თუ თქვენთვის არსებითი მნიშვნელობა ჰქონდა ვალდებულების დროულად შესრულებას.
6. 11.2.2. ფასის შემცირების ან ხელშეკრულებიდან გასვლის უფლება. თუ შეუსაბამობა გონივრულ ვადაში არ აღმოიფხვრა, მისი აღმოფხვრა შეუძლებელია ან ის თქვენ მნიშვნელოვან შეფერხებას გიქმნით, თქვენ უფლება გაქვთ:

1. 11.2.2.1. მოითხოვოთ საქონლის ღირებულების შესაბამისი შემცირება; ან
2. 11.2.2.2. უარი თქვათ ნასყიდობის ხელშეკრულებაზე და მოითხოვოთ ზიანის ანაზღაურება საქართველოს მოქმედი კანონმდებლობის შესაბამისად.

7. 11.2.3. თანხის დაბრუნების უფლება. თუ წინამდებარე ზოგადი პირობების ან მოქმედი კანონმდებლობის საფუძველზე გეკუთვნით თანხის დაბრუნება, თანხის დაბრუნებას პარტნიორის სახელით უზრუნველყოფს ბოლტი, წინამდებარე ზოგადი პირობების შესაბამისად. თანხა უნდა დაბრუნდეს თანხის დაბრუნების უფლების დადასტურებიდან 14 (თოთხმეტი) კალენდარული დღის ვადაში.
8. 11.2.4. დაგვიანება და შესრულებისადმი ინტერესის დაკარგვა. თუ პარტნიორი შეთანხმებულ ვადაში ვერ მოამზადებს საქონელს ან ვერ უზრუნველყოფს მის გასატანად ხელმისაწვდომობას ისე, რომ ვალდებულების შესრულება შეუძლებელი გახდება და თქვენ დაკარგავთ ინტერესს ნაწილობრივი შესრულების მიმართ, პარტნიორი არ იქნება უფლებამოსილი მოითხოვოს საქონლის ღირებულების ან შესაბამისი ხარჯების ანაზღაურება. თუ საქონლის ღირებულება უკვე გადახდილია, თქვენ გაქვთ თანხის დაბრუნების უფლება, რომელიც განხორციელდება წინამდებარე ზოგადი პირობების შესაბამისად.
9. 11.2.5. მტკიცების ტვირთი და დახმარება. საქონლის ნასყიდობის ხელშეკრულებასთან შესაბამისობასთან დაკავშირებული დავის შემთხვევაში მტკიცების ტვირთი განისაზღვრება წინამდებარე ზოგადი პირობების 10.8 პუნქტისა და მოქმედი კანონმდებლობის შესაბამისად. ბოლტი უზრუნველყოფს თქვენსა და პარტნიორს შორის კომუნიკაციის ხელშეწყობას, თქვენი მოთხოვნის ეფექტიანად განხილვისა და გადაწყვეტის მიზნით. საქონელთან დაკავშირებული პრეტენზია ბოლტ ფუდის პლატფორმის მეშვეობით წარდგენილი უნდა იქნეს შეკვეთის მიწოდების დღიდან არაუგვიანეს 30 (ოცდაათი) კალენდარული დღისა.
10. 11.2.6. კანონით გათვალისწინებული საგარანტიო უფლებები. წინამდებარე პუნქტით გათვალისწინებული უფლებები არ ზღუდავს და არ გამორიცხავს „მომხმარებლის უფლებების დაცვის შესახებ“ საქართველოს კანონით ან მოქმედი კანონმდებლობით თქვენთვის მინიჭებულ დამატებით საგარანტიო ან სხვა უფლებებს.

3. 11.3. არასათანადოდ გაწეული მიწოდების მომსახურება. თუ მიწოდების პარტნიორის მიერ გაწეული მიწოდების მომსახურება არ არის სათანადო და ხარვეზი არ არის უმნიშვნელო, მიწოდების პარტნიორის მიმართ გაქვთ შემდეგი უფლებები:

1. 11.3.1. ხარვეზის აღმოფხვრის მოთხოვნის უფლება. თქვენ უფლება გაქვთ მიწოდების პარტნიორს განუსაზღვროთ გონივრული დამატებითი ვადა დარღვევის აღმოსაფხვრელად, გარდა იმ შემთხვევისა, როდესაც აშკარაა, რომ ასეთი აღმოფხვრა შედეგს ვერ გამოიღებს, ან თუ თქვენთვის არსებითი მნიშვნელობა ჰქონდა მიწოდების დროულად განხორციელებას;
2. 11.3.2. ფასის შემცირების ან ხელშეკრულებიდან გასვლის უფლება. თუ დარღვევა გონივრულ ვადაში არ აღმოიფხვრა, მისი აღმოფხვრა შეუძლებელია ან ის თქვენთვის მნიშვნელოვან შეფერხებას ქმნის, თქვენ უფლება გაქვთ:

11.3.2.1. მოითხოვოთ მიწოდების საფასურის შესაბამისი შემცირება; ან

11.3.2.2. უარი თქვათ მიწოდების ხელშეკრულებაზე და მიწოდების პარტნიორისგან მოითხოვოთ ზიანის ანაზღაურება საქართველოს მოქმედი კანონმდებლობის შესაბამისად.

3. 11.3.3. თანხის დაბრუნების უფლება. თუ მიწოდების მომსახურება საერთოდ არ გაწეულა, თქვენ გაქვთ მიწოდების საფასურის დაბრუნების უფლება ხელშეკრულებაზე უარის თქმის შესახებ თქვენი შეტყობინების დღიდან 14 (თოთხმეტი) კალენდარული დღის ვადაში. თუ წინამდებარე ზოგადი პირობების ან მოქმედი კანონმდებლობის საფუძველზე გეკუთვნით თანხის დაბრუნება, შესაბამის თანხას მიწოდების პარტნიორის კომერციული აგენტის სტატუსით დააბრუნებს ბოლტი. აღნიშნული არ უნდა იქნეს განმარტებული ისე, თითქოს იცვლება ბოლტის, როგორც საინფორმაციო საზოგადოების მომსახურების მიმწოდებლისა და შუამავალი პლატფორმის ოპერატორის, სტატუსი, როლი ან პასუხისმგებლობის ფარგლები.
4. 11.3.4. დაგვიანება და შესრულებისადმი ინტერესის დაკარგვა. თუ მიწოდების პარტნიორი დროულად არ დაიწყებს მიწოდებას ან მიწოდება არაგონივრულად გაჭიანურდება ისე, რომ მისი შეთანხმებულ ვადაში შესრულება შეუძლებელი გახდება და თქვენ დაკარგავთ ინტერესს ნაწილობრივი შესრულების მიმართ, მიწოდების პარტნიორი არ იქნება უფლებამოსილი მოითხოვოს მიწოდების მომსახურების საფასური ან შესაბამისი ხარჯების ანაზღაურება. თუ მიწოდების საფასური უკვე გადახდილია, თქვენ გაქვთ მიწოდების პარტნიორისგან მისი დაბრუნების უფლება, ხოლო თანხის დაბრუნებას მიწოდების პარტნიორის კომერციული აგენტის სტატუსით უზრუნველყოფს ბოლტი.
5. 11.3.5. მიწოდების პარტნიორის უკანონო ქმედებები. მიწოდების პარტნიორის მიერ უკანონო ქმედების განხორციელების შემთხვევაში თქვენ უფლება გაქვთ მიმართოთ შესაბამის ადგილობრივ უფლებამოსილ ორგანოებს. ბოლტი მოქმედი კანონმდებლობის შესაბამისად ითანამშრომლებს შესაბამის ორგანოებთან.

4. 11.4. კლიენტს, რომელიც არის ფიზიკური პირი და მოქმედებს თავისი პროფესიული საქმიანობის მიღმა, უფლება აქვს, საქონლის მფლობელობაში მიღების დღიდან 14 (თოთხმეტი) კალენდარული დღის განმავლობაში, ყოველგვარი საფუძვლის მითითების გარეშე, უარი თქვას ნასყიდობის ხელშეკრულებაზე, 11.6 პუნქტით გათვალისწინებული გამონაკლისების დაცვით. ხელშეკრულებაზე უარის თქმის ფორმა თან ერთვის წინამდებარე ზოგად პირობებს დანართი №1-ის სახით.
5. 11.5.   კლიენტი უფლებამოსილია, ნებისმიერ დროს, ყოველგვარი საფასურის გარეშე, შეწყვიტოს ბოლტთან დადებული ხელშეკრულება და წაშალოს ბოლტის მომხმარებლის ანგარიში, ბოლტის აპლიკაციაში შესაბამისი მოთხოვნის წარდგენის გზით.
6. 11.6. ხელშეკრულებიდან გასვლისა და გადახდაზე უარის თქმის უფლების გამონაკლისები. თქვენ არ გაქვთ ნასყიდობის ხელშეკრულებაზე ან თანხის გადახდაზე უარის თქმის უფლება, თუ:

1. 11.6.1. საქონელი მომზადდა და მიწოდებულ იქნა თქვენი შეკვეთის შესაბამისად და ის მიწოდების ადგილზე მიიღეთ თქვენ ან თქვენს მიერ განსაზღვრულმა პირმა;
2. 11.6.2. შეკვეთა გაუქმდა მისი მომზადების დაწყების შემდეგ თქვენი მიზეზით, მათ შორის, თუ თქვენ განსაზღვრულ ვადაში არ იმყოფებოდით მიწოდების ადგილზე;
3. 11.6.3. მითითებული შეუსაბამობა ან ნაკლი უმნიშვნელოა;
4. 11.6.4. მიწოდებული საქონელი დამზადებულია კლიენტის ინდივიდუალური შეკვეთის შესაბამისად ან აშკარად მორგებულია მის პირად საჭიროებებზე;
5. 11.6.5. მიწოდებული საქონელი მალფუჭებადია ან აქვს ხანმოკლე ვარგისობის ვადა;
6. 11.6.6. კლიენტს მიეწოდა ჰერმეტულად დაცული საქონელი, რომლის ჰერმეტულობაც მიწოდების შემდეგ დაირღვა და რომელიც ჯანმრთელობის დაცვის ან ჰიგიენური მიზეზებიდან გამომდინარე დაბრუნებას არ ექვემდებარება;
7. 11.6.7. მიწოდებული საქონელი, თავისი ბუნებიდან გამომდინარე, მიწოდების შემდეგ განუყოფლად შეერწყა სხვა საქონელს;
8. 11.6.8. არსებობს „მომხმარებლის უფლებების დაცვის შესახებ“ საქართველოს კანონით გათვალისწინებული სხვა გარემოება, რომელიც გამორიცხავს ნასყიდობის ხელშეკრულებაზე უარის თქმის უფლებას.

12. 12. სხვადასხვა დებულებები

1. 12.1. ბოლტი იტოვებს უფლებას ნებისმიერ დროს შეიტანოს ცვლილებები წინამდებარე ზოგად პირობებში, განახლებული ზოგადი პირობების  ბოლტ ფუდის პლატფორმაზე განთავსების გზით, რის შესახებაც აცნობებს ბოლტ ფუდის პლატფორმაზე რეგისტრირებულ მომხმარებლებს მათ მიერ რეგისტრაციისას მითითებულ ელ. ფოსტის მისამართზე შეტყობინების გაგზავნით.
2. 12.2. ბოლტი უფლებამოსილია ნებისმიერ დროს, წინასწარი შეტყობინების გარეშე, ნაწილობრივ ან სრულად შეცვალოს ან გააუქმოს ბოლტ ფუდის პლატფორმის ცალკეული ფუნქციები ან სხვა შემადგენელი ნაწილები, შეცვალოს ბოლტ ფუდის პლატფორმა, მისი მახასიათებლები და ბოლტ ფუდის პლატფორმაზე მონაწილე პარტნიორები.
3. 12.3. მომხმარებელს ბოლტ ფუდის პლატფორმაზე წვდომა შეუძლია მხოლოდ ინტერნეტკავშირის საშუალებით. ინტერნეტთან დაკავშირების სპეციფიკური ტექნიკური მოთხოვნები დადგენილი არ არის, თუმცა ბოლტ ფუდის პლატფორმის მომსახურების ხარისხზე შესაძლოა გავლენა იქონიოს ინტერნეტის სიჩქარემ. ბოლტ ფუდის პლატფორმა ხელმისაწვდომია Android და Apple მოწყობილობებზე უახლესი პროგრამული განახლებების გამოყენებით.
4. 12.4. ბოლტ ფუდის პლატფორმაზე მომხმარებლის ანგარიშის შექმნისას, მომხმარებლის ტელეფონის ნომერი უკავშირდება მომხმარებლის ანგარიშს და ემატება ბოლტის მონაცემთა ბაზას. თუ მომხმარებელი განაახლებს თავის ტელეფონის ნომერს ბოლტ ფუდის პლატფორმაზე ანგარიშის შექმნის შემდეგ და სურს გააგრძელოს ბოლტ ფუდის პლატფორმის გამოყენება, მომხმარებელმა უნდა აცნობოს ბოლტს განახლებული ტელეფონის ნომრის შესახებ შეძლებისდაგვარად მოკლე დროში. ტელეფონის ნომრის განახლების შემდეგ მომხმარებელი ბოლტისგან მიიღებს დადასტურების მოთხოვნას მის ახალ ტელეფონის ნომერზე SMS ან სხვა საშუალებით. მომხმარებელი ვალდებულია გადაამოწმოს თავისი ახალი ტელეფონის ნომერი SMS-ში მითითებული ან ბოლტის მიერ გაგზავნილი ინსტრუქციის შესაბამისად. დადასტურების შემდეგ ტელეფონის ნომერი ავტომატურად განახლდება მომხმარებლის პროფილზე. მომხმარებლის მიერ ბოლტ ფუდის პლატფორმაზე პირადი ინფორმაციის განახლების შემთხვევაში, შესაბამისი ცვლილებები ასევე აისახება ბოლტის სხვა პლატფორმებზე (მათ შორის, სამგზავრო პლატფორმაზეც). თუ მომხმარებელი შეწყვეტს მის ანგარიშთან დაკავშირებული ტელეფონის ნომრით სარგებლობას და არ სურს მისი განახლება ბოლტ ფუდის პლატფორმაზე, მომხმარებელმა უნდა შეწყვიტოს წინამდებარე ზოგადი პირობები, რის შემდეგაც მომხმარებლის ანგარიში გაუქმდება. აღნიშნული საფუძვლით წინამდებარე ზოგადი პირობების მოქმედების შეწყვეტა და მომხმარებლის ანგარიშის გაუქმება არ ზღუდავს მომხმარებლის უფლებას, შექმნას ახალი ანგარიში ბოლტ ფუდის პლატფორმაზე მოქმედი ტელეფონის ნომრის გამოყენებით.
5. 12.5. ბოლტ ფუდის პლატფორმა ხელმისაწვდომია რამდენიმე ენაზე, რომელიც შეიძლება შეიცვალოს მომხმარებლის პროფილის პარამეტრების მეშვეობით.
6. 12.6. ბოლტი უფლებამოსილია თვალყური ადევნოს კლიენტის მოწყობილობის მდებარეობას ბოლტ ფუდის პლატფორმის მეშვეობით. ბოლტ ფუდის პლატფორმის ცალკეული სერვისების ხელმისაწვდომობა შესაძლოა შეიზღუდოს მომხმარებლის მოწყობილობის მდებარეობის მიხედვით. შესაბამისი შეზღუდვები აისახება ბოლტ ფუდის პლატფორმის  ინტერფეისში (მაგ. ხელმისაწვდომი პარტნიორების მდებარეობის მიხედვით). ბოლტი არ უზრუნველყოფს მომსახურების ხელმისაწვდომობას ყველა იურისდიქციაში. ვინაიდან ბოლტის სერვისების ხელმისაწვდომობა შეიძლება პერიოდულად შეიცვალოს, არ არსებობს იმ იურისდიქციების კონკრეტული ჩამონათვალი, სადაც შეიძლება ბოლტის მომსახურება იყოს ხელმისაწვდომი.
7. 12.7. ბოლტი უზრუნველყოფს მომსახურებების შემუშავებასა და მიწოდებას შესაბამისი ინდუსტრიული სტანდარტებისა და საუკეთესო პრაქტიკის გათვალისწინებით, მათ შორის, ISO 27001/27002 სტანდარტების შესაბამისად, რამდენადაც ეს შესაძლებელია და არ ეწინააღმდეგება სხვა შეთანხმებულ მოთხოვნებს.
8. 12.8. ბოლტ ფუდის პლატფორმით სარგებლობა და მის საფუძველზე წარმოშობილი ან მასთან დაკავშირებული ყველა სამართლებრივი ურთიერთობა რეგულირდება საქართველოს კანონმდებლობის შესაბამისად.
9. 12.9. თუ ამ ზოგადი პირობებიდან გამომდინარე      დავა მხარეთა მოლაპარაკებით ვერ გადაწყდება, მაშინ ის განიხილება და საბოლოოდ გადაწყდება საქართველოს კომპეტენტური სასამართლოების მიერ.
10. 12.10. თუ ამ ზოგადი პირობების ვერსიები ხელმისაწვდომია ნებისმიერ სხვა ენაზე, უპირატესობა ენიჭება ინგლისურენოვან ვერსიას.

    ---

დანართი 1

უარის თქმის ფორმა

ვის: ბოლტ ოფერეიშენს ოუ (Bolt Operations OÜ) (ვანა-ლოუნა 15, ტალინი, 10134, ესტონეთი, [email protected])

წინამდებარე ფორმის საფუძველზე, გაცნობებთ, რომ უარს ვამბობ შემდეგ ნასყიდობის ხელშეკრულებაზე:

შეკვეთის თარიღი: [ივსება კლიენტის მიერ]

კლიენტის სახელი: [ივსება კლიენტის მიერ]

კლიენტის მისამართი: [ივსება კლიენტის მიერ]

კლიენტის ხელმოწერა (მხოლოდ იმ შემთხვევაში, თუ ეს ფორმა მეორე მხარისათვის მიწოდებულია ფურცელზე ამობეჭდილი სახით):

თარიღი: [ივსება კლიენტის მიერ]